ابڙو اڪيڊمي Abro Academy
2020-07-22
داخلا نمبر 623
عنوان ڪُڪڙاٽ، ٽنڊو
شاخ پکي
پڙهيو ويو 312
داخلا جو حوالو:
ڪُڪڙاٽ، ٽنڊو
ڪُڪڙاٽ، ٽنڊو
60 کان 65 سينٽي ميٽر (26 انچ) قدبت واري هن ٻگهه ڪٽنب جا نر ماد هڪجهڙا ٿين ٿا ۽ لڳ ڀڳ سڄي ڏاکڻي دنيا ۾ ٿئي ٿو. ان جي پٺي گهري سرمائي نيري ۽ هيٺيون حصو اڇو ٿئي ٿو. ڪنڌ وٽ ٻن کنڀن جي سنهي چوٽي اٿس. اکيون ڳاڙهيون، چهنب مضبوط ۽ ڊگهي ۽ قد ننڍو ٿئيس ٿو.
ڪُڪڙاٽ رات جي وقت ۾ ڌٻڻين ۽ ڇَر تي شڪار ڪندو آهي ۽ سڄو ڏينهن روشنيءَ جي وقت ۾ پاڻ جهڙن ٻين پکين سان آرام ڪندو آهي. اهو پکي مڇيون، ڏيڏر، جيت ۽ ڪڏهن پکين جا چوزا به کائيندو آهي. ان جو آواز گهرو چيخدار ٿئي ٿو.
ان جو آکيرو وڻ يا ٻوڙن تي ڪاٺڙين جو ٿلهو ٿئي ٿو. نابالغ ڪُڪڙاٽ جا کنڀ ناسي ٿين ٿا. اڏامڻ مهل وڏي ڪانءَ جهڙو ”ڪان......ڪان“ آواز ڪندو آهي.
ڪُڪڙاٽ جي پَرن جي پکيڙ 105-110 س.م، وزن 550 کان 700 گرام ٿئيس ٿو. مڇي، ڏيڏر ۽ جيت کائي ٿو. مادي ٽن کان پنج هلڪا نيرا آنا ڏئي ٿي. ھي ماحول : 7 جو پکي آھي.